Cycling Mario

News neu uf www.mariokugler.ch

2011-05-23T22:51:00.003+02:00

Hoi Zäme

Lang isches här sit ich min letschtä Itrag gmacht han. I de zwüschezit isch so mängs passiert. Zurzit gits bi mir wichtigers als min Blog zfülle. Was aber nöd heist, das es kein News me git. Eifach e chli im chlinere Umfang. Defür brand aktuell und das wöchentlich.

Drum lueged ine uf www.mariokugler.ch

De rescht vo minere Homepage isch no in arbet und wir so bald wie möglich ufgschalte.

Bis bald
Cycling Mario

> 200 Kilometer

2011-04-03T22:11:00.025+02:00

Salü mini liebe Läser

Zerscht e grosses dankeschön a min Schatz und mini Chind wo so viel Verständnis für mis Hobby händ.
Hüt isches s'erschti mal i dem Jahr über 200 Kilometer gange. Für das bini i de Oschtschwiz gsi. Vo Binz isches nach de sibne richtig Winterthur losgange. Am Afang isches no richtig chalt gsi. Uf mim Garmin Edge 800 GPS Grät hani e Temperatur Azeig und die hät 4.2° azeigt. Bis am Schluss vo de Usfahrt häts dänn über 24° gha. 20° Unterschied isch immer so e sach was mär so allege und mitnäh söll das es für alli Temperature passt. Wichtig isch das am Afang für di erschti Zit e chli zchalt häsch. Dänn weisch das es richtig isch. Ab Winti bini in Frauefäld, Wifälde, Bischofzäll, Herisau uf Apezäll cho. Det hani en halt gmacht und bime Cappuchino en Schlorziflade gässe. Nachher no am Kiosk in Apezäll verbi und für mini zwei jüngere go Chaugummi Zigerettä chaufe. Die chunsch bi eus nüme über. Denn es heisst, dass verleiti den eher spöter zum Rauche. Ich find eher wämer alles verbüted, isch versuechig dänn spöter grösser. Nachher isch über Urnäsch id Schwägalp ufe gange. Da leider d' Alpepäss no alli im Winterschlaf sind muem mer sich mit de chline Höger zfride gä. Nacherä rasante Abfahrt bini über de Ricke heizue gfahre. Uf de ganze Strecki hät mer de Früehlig richtig gse blüe. Schliesslich hani ja gnueg Zit gha zum umeluege. Jetzt freui mir ufs Wätter vo den nöchste Wuche. Das gset eifach Super us.

Cycling Mario

Zum erschte mal de Säntis im Hindergrund

De Säntis zum zweite

und zum dritte

Eifach schön s'Apezäller Land

mmmmh Schlorziflade

Es cha witerga

Säntis ich chume

Das isch Musig für jede wo gern Päss fahrt

De Lohn fürs ufe Fahre

Top of season

Ab jetzt de Säntis nur no vo hine

Das isch Früelig

Schafböcke

2011-03-23T21:31:00.009+01:00

Es isch scho es zitli her sit ich de letschtig Itrag gmacht han.
Defür isch aber au einiges gange.
I de zwüschezit hani en Sponsor für d'Saison 2011 gfunde. Nachdem mir de enti nach fascht drü Monat hihalte abgseit hät, hani mit em Hermann Tröhler i eis paar Täg alles abgmacht. Somit fahri under TRÖHLER-SPORT.CH. Ich freu mi risig das es klappet hät.
So fahri das Jahr i de gliche farbe wie am Dunschtig bi de Usfahrte vom
Tröhler-Sport-Team. Es passt eifach zäme.
Vor zwei Tag isch den au s'erschte Träffe mit mim Team für Tortour 2011 gsi. Bimene feine Bier und Antipasti hämer inere gmüetliche Rundi eus uf Tortour 2011 i gstimmt.

De Winter hani guet fürd Vorbereitige chöne nütze dasi jetzt me Zit für anders ha.
Drum bin hüt au grad a e anders Ort go usfahre. De Namitag frei, schön Wätter, es isch Früelig, somit ab ufs Velo. S'Zil hüt isch gsi, go Schafböck in Eisidle go chaufe. S'guete dra isch, dass de Wäg döt hi mich über Sattelegg bracht hät. I drü viertel Hose hani de erschti Form tescht gmacht. Jede wo scho mal über Sattelegg gfahre isch weis, dass mer Zit nimmt ab de Chrüzig in Sibne wos is Wägital gat. Mit rund 85% leischtig bini i under 37min uf de Sattelegg obe gsi. Super wie das scho lauft. Ab det isches no en Chatzesprung gsi bis zum Tagesziel de Schafböck vo Eisidle. D'Sprungschanze vo Eisidle isch au no en bsuech wärt gsi. Leider isch niemert am Springe gsi. Es hät au eher Verlasse us gse. Guet es isch ja au e Summerschanze.

So, jetzt freui mi uf en schöne Früelig und wünsch eu e schöni Zit.

Bis bald
Fürabig Velofahrer Mario

Vo Eschebach richtig Glarne Alpe

Grüeni Passschilder sind immer guet

Bim Vorderthal rächts abbüge

Mini Schwyz

Bis zum letschtä Wintertag isch d'Saison gange

Fahre het mer zwar scho no chöne

Am Is ufem Sihlsee gats an Chrage

E Tankstell wo i 1sec de Bido volä häsch

Eisidler Sprungschanzene

Imposant wies steil de Alauf isch

Mal im Summer ga wäns am flüge sind

D'Schafböck nöd use la, susch frässeds Blueme

Vo Züri uf Lozärn

2011-02-12T22:06:00.011+01:00

Hüt isches i di schön Innerschwiz gange. S'Wätter im Februar isch ja scho fascht Früelighaft und ladet eim richtig i zum e längeri Usfahrt mache. Das hät mer au a de Lüt in Züri und Lozärn gmerkt. D'Strasse sind voll devo gsi und ganz viel händ gschtralet wie d'Sunne. S'Wätter macht halt scho ganz viel uf d'Stimmig vo de Mänsche us. Über Züri isches verbi am Ferdy Kübler Weg über de Albispass gange. Das sind no Zite gsi wo der Ferdy National Räne gfare isch. Wobi si scho dazumal nöd nume mit Wasser gfare sind. Wer scho Radsportbuecher gläse hät cha das sicher beschtätige. Uf de andere Site vom Albis bin über Cham richtig Lozärn gfare. In Lozärn acho bini direkt zum See gfare. Am Seebecki händs sich scho ganz viel gmüetli gmacht und de super Tag richtig gnösse. Wo ni mini Föteli gmacht han, bini au en Turischt in Lozärn gsi wie no ganz viel viel anderi mit irne Fotiapparät. Schliesslich isch ja Lozärn Wältbekannt bi de Turischte wo d'Schwyz bsueched. Dänn isches den au scho wieder richtig hei zue gange. Über Meggen - Immensee am Zugersee entlang bini wieder uf Züri cho. Au döt händs Seeufer belagerät. Es isch halt eifach schön wämmer am Wasser cha sitze und eifach si. Di hei acho hät de Tacho 125 Km me druf gha und ich e schöni Usfahrt me.

Bis zum nöchschte mal
Cycling Mario

De Wäg isch in Adliswil

Vom Albis richtig Züri

Wasserturm erbaut vor der Kappelbrugg

Kappelbrugg, die eltischt überdachti Holzbrugg vo Europa

Vo Lozärn gägge Wäggis zue

De Schnee hät sich scho wit zrugzoge

Iladend für es Bad im See

Eifach gnüsse

Sunne! Sunne! Sunne!

2011-01-29T23:00:00.010+01:00

Hüt hät äntli wieder emal d'Sunne füre glueget. Drum häts mi au use zoge zum e schlaufe im Züri Oberland z'mache. Es hät au sin reiz im Winter dusse go Velofahre. Schön findis immer wän d'Strasse troche sind und d'Wisse mit Schnee bedeckt sind. So machts au nüt wäns um die 0° isch wie hüt. Hauptsach es schiint d'Sunne. Den die git dir wieder Chraft wot bruche chasch für die Täg womer under de Näbeldecki hocked. Am zwei bini die hei abgfahre und über Grüenige - Bubike - in Hasestrick ufe. Zum Bachtel hani nöd chöne fahre den döt hänts Strass gsperrt fürd Schlittler. Das isch au guet so, denn Tage wos mit em Schlitte chönd uf de Strass abe fahre sind ja nöd so viel wie die wo ich mit em Velo cha fahre. Vom Hasestrick isches übers Girebad - Bäretswil - Hittnau - Fehraltorf hei zue gange. Usgangs Fehraltorf hani no de Oschterhas troffe. De wärded ihr ja sicher au bald gse wän ihr snöchschtig mal bim Grossverteiler gönd go Poschte.

Bis bald
Cycling Mario

Immerhin me blau als grau

Richtig Girebad nume blau

Bi dem Wäter brüsch d'Sunnebrüle

I de miti de Bachtelturm

In Girebad isch d'Langlaufloipe offe gsi

De Oschterhas!

Saisonstart 2011

2011-01-01T21:41:00.010+01:00

Hoi Zäme
Au i dem Jahr schrib ich was ich so alles bi mine Usfahrte erläbe.
Wünsche allne viel Spass bim läse vo mim Blog und alles gueti im 2011.

Da ich mich für Tortour 2011 als Solofahrer agmäldet han, heists de Winter dure gueti Grundlage schaffe. Han jetzt scho respächt vor dere Herusforderig vom 11. bis am 14. August.
S'Wätter hät hüt mitgmacht und die erschti Fahrt uf de Strass hät chöne losga. Min Team Chef vo de Tortour, de Peter isch au mitcho und so hämmer eus nach de elfi in Wittike troffe. Zum Start hämmer grad zwei Seeetour gmacht. Das isch um de Züri- und de Obersee. Eimal im Jahr hani das im Programm. Zviel mal chasch das nöd mache, dänn de Verkehr um de See isch nöd grad agnäm. Hüt hani ghofft, das no viel am usschlfafe sind vo de Silväschternacht. Und es hät würkli nöd so viel uf de Strass gha. Schad isch gsi, das mer d'Sunne nur ganz am ändi vom Obersee gse händ. Aber defür hämmer scho mal de erschti hunderter im 2011 gmacht.
Mir händ au no anderi Sportler gse. Da hät sich glaub de eint oder ander en vorsatz fürs neue Jahr gmacht. D'frag isch immer, wie lang das er anehebät. Für Vorsätz bruchi de Jahreswächsel nöd, dänn das chunt doch sälte guet. Drum nä wies chunt, es chunt scho guet.

Cycling Mario

Und weiter geht die wilde Fahrt!!! Au im 2011!!!

Blau am Horizont. Das isch den aber au scho alles gsi für hüt.

Proscht 2011! Es mues ja nöd im Champagner si.

In Lache hämmer chöne Lache.
Den da hät es Brunne gha,
wo nöd im Winterschlaf gsi isch.

Wintertraining

2010-12-11T21:00:00.007+01:00

Nachem letschte Itrag isches no ei Wuche gange bis sich de Winter gmäldet hät. Das heisst für mich Trainingsrolle parat mache für die Tage womer nöd uf de Strass cha go fahre. Hüt isch wider eine vo dene Tage gsi woni use bin go fahre. De Schnee uf de Strasse hät sich verzoge und Temperature sind au knapp im plus Bereich gsi. Am Zürisee hät sich de Schnee sogar ganz zrugzoge was mim Velo au gfale hät. Dän wäns flisig am Salze sind chasch bim Velo fascht zueluege wie alles rot (roschtig) wird wänts nöd nach de Usfahrt duesch absprütze. Das im Dezämber am fahre bisch, merksch wäns überall am Chrischtbaum verchaufe sind. So hät jedi Jahreszit sini Sache wod ab de Strass chasch chaufe. Was s'Wintertraining au no a sich hät, isch das die wärme Velochleider chasch usfahre. Dänn ohni die bisch ufgschmisse im Winter. Ich bin eimal inen Wintersturm mitem Rennvelo inecho und han nöd die wärmschte Händsche debi gha. Woni den dihei acho bin hani nöd emal chöne de Schlüssel usem Trikot usenä zum Tüfgarage ufmache. Min Schatz hät mich dänn a de Türe in Empfang gna und mir us de Chleider gholfe das ich han chöne uftaue. Drum lieber am Velo spare als a de Bechleidig.

Wärmi Gruess und bis zum nöchste mal
Cycling Mario

Jede Üriker weiss wo das isch

Uf de linge Site Schloss Rapperswil

Hoffentli händs bis am 24. ali verchauft

Es gat nüt über gueti Winterchleider

Fahrt zum Tortourstart

2010-11-14T23:30:00.008+01:00

Salü zäme
De Herbscht hät sich nomal vo sinere beschte site zeigt. Es isch so warm gsi das mer d'Wädli nomal de Sunne hät chone zeige. Nach de erfolgriche Amäldig für Tortour isches scho fascht uf de Hand gläge das es nomal i dem Jahr zum Rhyfall use gat. Es sind au no de Peter min Teamchef für Tortour 2011, Tatjana Solofahrerin Tortour 2011 und de Dani Teamchef vo de Tatjana für Tortour 2011 debi gsi. Uf de Huus Strecki isches richtig Rhyfall gange. Das es richtig Winter ghat merkt mer, da scho ganz viel Tankstelle (Brünne) zue sind. Au bim Rhyfall hät de Kiosk zue gha. Schad, mir hetäd gern es Falke trunke bi dem schöne Wätter. So häts halt öpis us de Trikot täsche ghä. Da hät a jede so sini eigete sache woner gär ist. Die einte ässed de Klassiker Bannane oder Riegel. Was auf viel debi händ isch süesses wie Biberli, Nussgipfel, Schnäge usw. Das isch de Vorteil wänt viel und lang gasch go Velofahre. Muesch nöd go Kalorie zelä. Ämel sicher nöd wäred em Training, dänn da muesch luege das nöd zwenig zue der nimsch wänt me als drü schtund gasch go fahre. Bis drü Stund chumi ganz guet ohni ässe us. Da luegi das i vo de resärve cha zerä. Nachdem mir eus gstärch händ, isches mit volle Bidon wieder Heizue gange. Ufem Heiwäg hani dänn no es paar mal mini Helmkamera agschtelt. Voll Cool wänt das ganze den die Hei chasch aluege was alles so uf de Fahrt passiert isch.
Underm Link unedra, chönder en Video aluege woni bim Bike i de Region Pfannestil uf gna han. Me Film werded no folge.

http://www.youtube.com/watch?v=mBgvaGQw118

Bye for now
Cycling Mario

Die beide Solofahrer mit irne Teamchefs

De Winterpelz muess no warte bi dem Wätter

Die verdienti süessi Pause

Rhyfall mir chömed wieder

Spötischtes am 10. August 2011 simmer wieder da

Tortour 2011

2010-11-11T11:11:00.004+01:00

Am 11.11.2010 am elf ab elfi hani mir für Tortour 2011 agmäldet. Nach de Tortour 2010 häts für mich gheisse "nach de tortour isch vor de tortour". Scho döt hani mich mit eme Solo Start für Tortour 2011 befasst.Mir händ au scho nach de Tortour 2010 uf Tortour 2011 miteme Eidgenoss agschtosse.
Mit de Family alles abgsproche ob ich das nomal cha mache. Den das isch nöd sälbscht verständlich da ich ja me als ei mal pro Wuche ga go Velofahre. Vile Vile dank a mini lieb Family wo mich debi understützt.
Nachher häts gheisse Kollege wieder afröge öb si das nomal mit mir wänd erläbe. Jede wo debi gsi isch hät sofort wider zue gseit. Au ihne vile vile dank. Ich freu mi jetzt scho wider uf e lässigi Vorbereitug und e super Tour rund umd Schwiz.
22 Stunde vor de Amäldig hani es Mail vo de Tortour übercho si hegäd s'Datum um ei Woche nach füre verschobe. Nöd grad so die feini Art. Den hets gheise sofort alli wieder afröge öbs ine au a dem Datum gat. Den wäs nützts, wäns mir gat aber ich keis Begleitteam ha. Nachdem mir die meischte grüens Liecht gä händ, häts gheise warte bis am elf ab elfi un dän amälde. Das isch den en richtige run uf Startplatz gsi. Den am Abig am sibni sind scho i allne Kategorie Platz usbuechet gsi.

Ab jetzt heists Trainiere für Tortour 2011!!!

Bis bald
Cycling Mario

Kickoff Meeting Tortour 2011

Tröhler Sport Team

2010-10-30T22:00:00.012+02:00

Als Tröhler Sport Team sind mir abem nöchschte Früelig underwägs. Das sind Tatjana, Cornelia, Jarle, Daniel, Peter und ich. Sobald d'Summerzit 2011 afangt träfed mir eus jede Dunschtig am halbi sibni bim Tröhler in Fehraltorf für e gfüerti Usfahrt. Es sind immer mindeschtens zwei usem Team debi wo Gruppe füered. Es sind alli ganz herzlich iglade mitem Rennvelo mit zcho. Da S'Wätter zurzit no richtig iladend für schöni Herbschtfahrte isch, hät eus de Hermann scho mal i kleidet. So hämmer eus am Samschtig Namitag in Fehraltorf troffe für die erscht gmeinsami Usfahrt. Super häts usgse wo mer zvierte al i de gliche farbe d'Strasse zum schmelzä bracht händ. Vo Fehraltorf isches über Wisslig - Kollbrunn id Region Frauefäld gange. D'Sunne hät für die Jahreszit nomal richtig abe brännt. Das hät au Tatjana zgspüre über cho. Da scho alli lange Trikots i ihrere Grösse wäg gsi sind, isch si i de Winterjage mit cho. Di Jage häts i sich. Si isch super wäns richtg chalt isch. Aber bi dene Temperature wo mir hüt gha händ laufsch fasch us. So häts den in Kollbrunn au scho de erschtig Stop ghä zum Bido uffülle. Nachher simmer i de Region Oschtschwiz underwägs gsi und das wie immer ohni Liechtsignal. Das fallt eim immer wieder uf den bis eus häts vo denä eifach zvil. Uf de Ladeschluss vom Tröhler sind mir den au wider zrugg gsi vo derä schöne Herbschtfahrt. Hofed mir das s'Wätter noch chli ane hebt und mir noch zäme die eint oder ander Usfahrt i dem Jahr chönd mache.

Mir gsend eus. Spötischtens am 31. März 2011 zur erschtä Usfahrt.

Hermann Tröhler, Tatjana, Daniel, Peter und ich vo de Trainingsgruppe

Vo da gats den abem 31.3.2011 los

So gsents vo hine us im Tröhler look

Tankstell in Kollbrunn

So gsents vo vorne us im Tröhler look

Fahrt der fallenden Blätter

2010-10-15T23:00:00.001+02:00

Salü mitenand.
Hüt hani nomal e langi Usfahrt gmacht. Han am Namitag frei gmacht und bin zu de Family um Sumvitg gfahre. Ab Volketswil isches bi chüele 9 Grad richtig Rappi - am Obersee entlang is Glarnerland gange. D'Sunne hani bis det no keini gse. Au woni über de Keränzer gfahre bin hät S'Wätter immer glich us gse. grau grau grau. Ab Walestadt bini alles ufem Velowäg bis uf Landquart gfare. De wäg isch super beschilderet gsi und es wär schön wäns au a andere Ort i de Schwiz es so wär. Mä häts ja nöd immer es so eifach mit em Velo uf eusne Strasse. Es git doch immer wieder Autofahrer wo dir chönd miteme Abstand vo 30cm a der verbi fahre. Di söt mer ali mal ufs Velo setzte und a ihne mit dem Abstand verbi fahre. Denn würdes mal märke wie sich das afühlt.Witer isches über Chur richtig Bonaduz gange. In Bonaduz hani den no es bizeli blaue Himmel gse. Leider bini in Sumvitg erscht im dunkle acho und han dsune wos am Namitag gha händ nüme chöne gnüse. Gnüse häni defür mini fahrt chöne. Ab Bonaduz bini über Versam uf Ilanz gfahre. Wunderschön isches gsi hinedure uf Ilanz zfahre und nöd a de Hauptstrass entlag über Flims - Laax uf Ilanz. Uf dere Strecki hani den no en Randonneur troffe. Was en Randonneur isch chasch im Wikipedia naläse. Öpe e hand voll Velofahrer hani uf de ganze Strecki atroffe. Um die Zit sind ja au nur no die ganz agfrässne (für die einte die chranke) mit em Velo underwägs. Ab Ilanz isches uf de Hauptstrass no di leschte Kilometer bis zum Ziel gange. Det hani leider au de eint oder ander Autofahrer atroffe woni obe beschribe han. In Sumvitg acho, händ di letschtä zwei Kilometer mich nomal gforderät. Im Durchschnitt isches mit 10% durufgange. Zfride und mit 192Km und 2000Hm bini vo de Family empfange worde.

See you Cycling Mario

Randonneur: http://de.wikipedia.org/wiki/Randonneur_(Radfahrer)
Sumvitg: http://de.wikipedia.org/wiki/Sumvitg

Vo da bini cho (grau)

Richtig Chlause (grau)

I die richtig bini gfahre (grau)

Tankstell im Sarganserland

Chur (grau)

Bi Bonaduz (blau)

Region Versam

Region Versam

zfride und glücklich

Team Usfahrt zum Tortourstart

2010-06-12T23:00:00.000+02:00

Hüt isch Team Usfahrt ufem Program gstande. Mir händ ois am zwei in Hegnau bim Chappeli-Kreisel troffe. De Jarle, de Tom, de Johannes und ich händ no chli müese warte bis de Mech vom Bike Center Hegnau am Peter sim Velo s'Schaltkabel ersetzt hät. Mir sind den über Effretike - Embrach - Flaach richtig Rhyfall gfahre. Der erschti halt hämer bim Brunne in Berg am Irchel gmacht. Mit volle Bidon isches ab Flaach ufem leschte Strecketeil vo der Tortour witergange. Vor Benke simmer abboge und über d'Brugg bi Dachse (gat nur mitem Velo oder Zfuess) richtig Rhyfall gfare. Bim Start vom Tortour Prolog acho hämer en Kafi, Chueche und Foti halt gmacht. Mir händs eus denn au no mittenand Fotografiere la. Es isch immer wieder luschtig was am Schluss für Fotene use chömed. D'Resultat gsend ir unedra. Nachdem mir eus gschtärcht händ simmer ufs erschti Teilstuck vo der Tortour 2010. Miteme guete Zug sind mir bis uf Steckborn gfahre. So hets Begleitteam scho mal die erschte Kilometer käne glernt und mir wüsed jetzt au genau wos duregat. Das ja a de Tortour am morge am halbi vieri lost gat, git das e guets gfühl wämer di Strecke intus händ. In Steckborn simmer den rächts abboge richtig heu zue. Wobi es sind denn scho no einigi Kilometer gsi bis mir wieder in Hegnau a cho sind. Das het der eint oder ander gäge de Schluss den no zspüre übercho. Went nüme magsch isches so wie wenn dis Auto 10l uf 100Km brucht und du versuechsch mit 5l 100Km wit zcho. Das brigsch au nur ane wenn de Motor abstellsch wäns durab gat und fascht nur im Standgas fahrsch. Es isch eifach zum säge wenn din Motor 10l brucht und 20l zur verfüegig häsch. Zfride und mit 140Km i de Bei hät sicher jede geut Gschlafe und troimt vo de Tortour.
Hasta luego Cycling Mario

Tankstell bi Berg am Irchel

Churz vor Dachse

Fotograf eis

Fotograf zwei

Pragelpass

2010-06-09T22:20:00.025+02:00

1550 müM isch nöd grad viel für en Pass. Aber de Pragelpass vom Muotathal her isch öpis vom steilere vo mir id Schwiz händ. Mittwuch schöns Wätter und ich han min freie Namitag. Mini Family hät mir grüens Liecht gä das ich cha e Tour go fahre. A dere Stell wöt ich minere Family danke das sie soviel Verständnis für mis Velofahre händ. I dem Jahr gits doch no de einti oder anderi Kilometer me wäge de Tortour.
Vo Volki isches denn über Uster - Esslingen - Hombrechtikon - Rapperswil - Pfäffikon gange. Den duruf uf Schindelegi. Obe acho häts den en zügige Gägäwind gha. Gäge de hani kämpft bis ganz hindere is Muotathal. Vom Sattel obe abe richtig Schwyz hani de Abstand zu de Leitplanke müese vergrössere. Denn bi dem Sitewind obe abe, häsch guet müese luege das di nöd id Leitplanke ine blaset. Ab Schwyz richtig Muotathal bin zwüsched düre fascht gschtande. 25km hani amigs ufem Tacho gha obwols gradus gange isch. Bevors mit de Stigig los gange isch hani nomal mini Bidons mit em guete Pulver vo GS Food gfüllt. Wenns Pulver richtig dosiere tuesch isch alles Super und niemert muess under de Blähige flüchte. Die einte chönted es Lied drüber Singe. Nach es paar hundert Meter isches den grad so richtig losgange mit em ufschtig richtig Pagelpass. Di erschte Kilometer händs in sich. Zwei mal chasch ganz churz erhole bi 10% stigig. De rescht isch eifach steil steil und nomal steil. Wenn denn bi de Tafle 8x Weidrost acho bisch häsche fascht gschaft. Ab det gats nur no ganz moderat duruf. Obe ache no es Foti vo de Passtafle. Woni am Wägitalersee acho bin hani no e unfreiwiligi Pause müese mache. SF isch grad amene Film drähe gsi. Mit eme gäle VW Chäfer sind x mal hin und her gfahre bis es im Chaschte gha händ. Ab Netstal über Ziegelbrug - Kaltbrunn häts Rugewind gha wo mi richtig schön heitreit hät. Di hei acho häni 182 Km und 6500kcal meh uf mim Tacho gha.

Bis zum nöchste mal
Cycling Mario

Region Rothethurm

Richtig Muotathal

Unschinbar stat Pragel uf de Tafle

Ischtig zum Pragelpass

Schmal und Steil isches ufe gange

Ab dere Tafle häsch die steilschte Stell hinder dir

Steihuus uf de Passhöchi

Wänd Tafle gsesch weisch "Du häsches gschaft"

Klöntalersee

Nachtfahrt

2010-06-05T23:59:00.009+02:00

Hüt isches uf di erscht Nachfahrt gange. Am halbi achti bini mitem Pesto richtig Rhyfall losgfahre. Mir händ vorgha das mir de erschti Strecketeil vo de Tortour dönd fahre. S'Wetter het nöd chöne besser si für die Jahreszyt. Bis Mitternacht simmer no alles churz gfahre. Vor Embrach hämmer schos zweiti mal es Tier über Strass gla. Bi Brütte isches en Wiesel? und vor Embrach e jungs Reh gsi. Nachdem mir Embrach hinder eus gla händ, häts no en schöne Sunneundergang gä. Mit Liecht isches den imene guete Tempo zum Start vo de Tortour gange. Bim Rhyfall no di obligate Föteli. Wobi bi Nacht simmer no nie da gsi. De erschti Strecketeil bis uf Steckborn hani i mim Velo Navi gstartet. Jetzt nur no de Start sueche und denn chas los ga.
S'Navi hät eus immer gseit wos dure gat. Es funktioniert fascht glich wis Navi im Auto. De Underschied isch, dass es anschtel vo de Stimm jewils en Piepston git und Liecht i de Nacht wenns e Richtigsänderig git. Nach öpe zwei drittel vo de Strecki hät eus s'Navi gseit mir sölled links abbüge. Das hämer denn au gmacht und uf eimal simmer inere 30er Wohnzone glandet. Irgendwie cha das nöd stimme hämmer eus gseit. Wobi S'Navi hät doch gseit mir sölled links abbüge. Ja Ja Navis händ scho mängs gseit wo nöd so ganz stimmt. Das isch sicher scho jedem mal passiert das er ganz amene ander Ort gsi isch als er hät wölle (Navi sei dank). Binere spötere Usfahrt hani denn gmerkt, das mer am Navi mues istellä, das er nöd dörf uf de Strecki wo vorgeh isch neu berächne.
Mitternacht häts gschlage wo mir bi de erschtä Wechselzone vo de Tortour in Steckborn a cho sind. Das isch ufem Parkplatz vo de Bernina. Leider hät de Lade nöd ofe gha, suscht hetemer eusne Fraue gern e Machine vo de Bernina hei bracht. Nachdem ich de zweti Strecketeil gstartet han und mir eusi Koffeintablette (Test für Tortour) gna hend simmer losgfahre. Bi Chrüzlinge simmer rechts abboge und händ eus richtig heiweg gmacht. Richtig Frauefeld isch denn no e Chatz (4bei) uf de Strass ghocket. Wo mir anere verbi gfahre sind, hät si kei aschtalte gmacht au nur es bitzeli ufd site dsga. Irgendwie wie de Cheriff vom Dorf.In Frauefeld simmer dur de underirdisch Chreisel gfahre. Irgendwie Speziell so en Chreisel underem Bahnhof. Wobi mir mitem Velo de Chreisel gar nöd dörf befahre. Hend mir aber erscht binere ander Usfahrt gse.
Nach de Ortstafle Winterthur simmer no amene chranke Autofahrer begägnet. Irgendwie hät de kei froid ga um die Zit no Velofahrer uf de Strass zträfe. Im Zentrum vo Winti sind no Nachtschwärmer underwägs gsi. Wobi di einte scho ganz müed (blau) us gse händ. Leider rüerets denn amigs ihri Glas Fläsche uf de bode was mer als Gümmeler nöd würkli gern hät. In Fällande hämer eus verabschidet und beid händ ihre Hill no dörfe ufe Fahre. Da mir beide ufem Hoger obe wohned, dörfed mir am schluss immer no 200hm ufe fahre. Zfride und müed bini denn is Bett und hän super chöne schlafe trotz de Koffeintablette.
E glungeni Nachtfahrt mit neue erkäntnis fürd Tortour.

Sonnenuntergang

Sonnenuntergang

Rhyfall by Night

Rider Peter

Rider Mario

Leider zgross gsi zum Mitnä und de Lade hät au scho zue gha.

Super (Tor)Tour!

2010-05-24T22:44:00.005+02:00

Ändlich isches wieder mal super Wätter für e grösseri Usfahrt. Ufgstande bini um die glich Zit wied Sunne. Müesli mit Milch und en Ovi mit Wasser häts zum z'Morge gä. Nachdemi de Smart belade han, isches richtig Landquart gange. Am achti bini denn richtig Davos losgfahre. Bis Fideris Station dörf mer nöd uf de Hauptstrass fahre. Somit bini ufem Velowäg bis uf Fiders gfare was links und rechts im Schatte vo de Haupstrass gsi isch. Bis am Schluss hetzt den aber gnueg Sunnestunde ghe. Me seit das segi ja e nöd so guet so lang a de Sunne usgsetzt zsi. Wobi was isch denn hüt no gsund? Für mich isches eifach schön, e sibe Stunde Tour zfahre. Für ander isch das eher öpis wo mer nöd cha verschta. Ab Fideris isches denn au losgange mit de Höhemeter. Bi Küblis wär jetzt a de Tortour zit gsi zum Unterschribe um Strecki von Küblis nach Zernez zfahre. Das gat aber no knapp drü Mönet bis es sowit isch. Gümmeler hani hüt i de Berge nöd viel atroffe. Wiso weiss i au nöd ganz, denn es isch Postcharte Wätter gsi und Temperatur het nöd chöne besser si für sone Usfahrt. Verbi a Kloschter über de Wolfgang isches uf Davos gange. De erschti Bidon isch ustrunke gsi und ab jetzt bini mit em Hi End Energizer vo eusem Sponsor gsfood.ch gfahre. 75gr Energizer pro 7,5dl Bidon und ab und zue en Dinkelriegel auf vo GS Food. Bis am Schluss hani 6 voli Bidon und 5 Dinkelriegel für di verbruchte 8188kcal zu mir gno. Vo Davos richtig Flüela gats eher moderat für en Alpepass duruf. Eimal churz 10% suscht alles rächt glichmässig zwüsched 5% und 8%. Was mer guet merkt, isch das d'Luft dünner wir und d'Leischtig es bitzeli zrug gat. Ab de Passhöchi isches imene schöne Speed richtig Susch und den uf Zernez gange. Jetzt wär wieder Zit zum Unterschribe a de Tortour. Das es ja nonig so wit isch hani in Zernez trotzdem churz a ghalte zum de Bidon wieder uf zfülle. Miteme liechte Gägewind bini verbi an Zuoz, St. Moritz uf Silvaplana cho. Nacheme erneute Stop bimene Brune isches den grad mit über 10% richtig Julier gange. Im flache Teil am Julierpass hani no Murmeli am Strasserad gse. Obwohl, die meischte säged immer das Gümmeler nur den Asphalt und nüt vo de Umgäbig gsend. Ich find das mer genau soviel gset wie wämer mit em Mountainbike oder de Wanderschue underwegs isch. En churze halt ufem Julier für s'Foti vo de Passtafle. Au ufem Julier wär wider Zit gsi für de Fahrerwächsel. Leider hani keine gse wo mit mir hät wöle tusche und so bini d'Strecki uf Bonaduz sälber gfahre. Wer meint uf Bonaduz gats nur durab und gradus de tüscht sich. Gemäss Tortour sinds 64.2 Kilometer und 1200 Höhemeter.Öb das stimmt mit den Höhemeter? Ab Bonaduz würs a de Tortour links richtig Disentis ga. Ich bin den aber rechts richtig Chur - Landquart gfahre. Vor Chur het den no eine a'ghänkt. Gseit het er nüt und füere het er au nöd wölle. So bini den im Chreisel in Chur eimal rundume gfahre und so hät er denn au mal dörfe vorne si. In Landquart a cho het de Smart scho uf mich gwartet mit em Recovery Drink von GS Food. 213 Kilometer und 3300 Höhemeter hani ufem GPS abgläse. De max. Speed söll 97.7 Km gsi si. Das chani aber nöd ganz glaube, wüst nöd woni so schnell gsi bin. Das muesi den no genau uswerte. Di hei hani nämli versproche das i mi bim abe Fahre zrug halte tuen. Und den so öppis, da chunsch i erchlärigsnot. Wobi swichtigscht isch dasi wieder gsund und heil a cho bin.
Bis zum nächschte mal Cycling Mario

Zugpferd an der Schwägalp

2010-04-25T21:21:00.020+02:00

Sibni isches gsi woni di hei losgfahre bin. In Volki hani de Pesto troffe wo mir eus uf de Wäg is Appenzell gmacht händ. Trikots sind mit Winforce gfüllt gsi. Das händ mir am letschtä Zischtig bim Tortour Info Abig zum teschtä übercho. Am Afang no vollen lobes für Winforce. Schliesslich händs eus gseit das de Dani Wyss bim Sieg am RAAAM 2009 die ganze nün Täg sich mit Winforce ernärt hät. Mir händ Carbo Basic Plus zum Trinke und Ultra Energy Complex zum esse debi gha. Zum Glück händ mir in Appenzell eus no mit öpis anderem verpflägt denn döt hämmer scho gnueg gha vo Winforce. Gege de Schluss hämmer de Bidon nur no mit Wasser gfüllt und Winforce am Chübel gschänkt. Dihei isch den de Mage zunderopsi gsi und hät au no gas wölle los werde. Super Wätter isches gsi und das hät mer au guet gmerkt, denn es sind ganz viel mitem Velo underwägs gsi.In Appenzell acho hämer denn gmerkt das da öpis speziells los mues si. Womer uf de Hauptplatz händ wölle fahre isch de abgsperrt gsi wäge de Landsgmeind. Überall sinds mit ihrne Säbel ume gloffe die stolze Appenzeller. Si sind sogar vo Gonte obe abe zfuess ad Landsgmeind gange. Nacheme feine Appenzeller Bier und zwei feine sache zum Esse sind mir richtig Schwägalp gfahre. Locker hämmer wolle ufe fahre. Doch da isch nüt drus worde. Uf eimal hät eus eine uf de grosse Schibe überholt. De Pesto hät grüeft ich söll doch hinedri. Ok, zwei gäng grösser schalte und asuge isch devise gsi. Nachere churze strecki hät de Fahrer mit em Fuji Velo au uf di chli Schibe gschaltet. Agleit ischer mit em Trikot vom Footon-Servetto-Fuji Team gsi. Dihei hani den im Internet gse das er (Ermanno Capelli) Profi us dem Pro Tour Team isch. Ich han den chöne di ganz Zit im am Hinderrad blibe bis uf dFläche vor de Passhöchi. Ab det het er Bei hange la und ich hanen überhölt und bin no bis ganz ufe gfahre. Ich weiss nöd öber uf sini Fründin (Jennifer Hohl Schwizermeischterin 2009) gwartet hät oder was mit im los gsi isch. Bi de Tafle vo de Passhöhi händ mir den no sobligate Foti gmacht bevor mir miteme schöne Speed obe abe gfahre sind. Vor Wattwil hämer eusi Bido nomal mit Winforce gfüllt. Nöd wel mir händ wölle sonder eher müese damit mir nöd en Hungerascht ifahred. Bim Brunne in Rüti häts denn nur no Wasser ghä für die letschtä Kilometer. Am zwei sind mir denn au scho wieder di hei gsi und händ de Sunntignamitag noch chöne gnüse.

Appenzell Rundfahrt

2010-04-07T22:11:00.018+02:00

Mittwuch Namitag, schöns Wätter und ich han frei. Vo dihei hani gruens liecht übercho woni gseit han das es chli spöter chan werde. Am morge hani beschlosse das ich üf Appezell fahre. Isch halt scho super wo mer vo die hei us überall mit em Velo umechunt. Am halbi eis bini den vo der Arbet direkt losgfahre. Is Tösstal hindere und als erschte hoger über d'Hulftegg. Vo det richtig Liechtensteig und den über d'Wasserfluh nach Hundwil bis i den in Apenzell a cho bin. Det hani mit em iPhone es par Föteli gmacht woni hei gschicht hat. Poschtwendend hani denn e Nachricht übercho das i no mues Kaugummi Zigarette chaufe. Denn die giz bi eus nöd. So hani denn am Bahnhof Kiosk zwei mal für 80Rp. a 10er Box kauft. Nachere Wähe und eme Getränk (top secret) bini denn richtig Schwägalp losgfahre. Bim Kronberg sind ganz viel mit em Gleitschirm umegfloge. Das würdi au gern als Hobby mache. Aber di meischti Zit vo minere Freizit hocki ufem Velo und fahr es bitzeli i de Schwiz ume. Besser öppis recht mache als vo allem es bitzeli. Vo Urnäsch isches den losgange mit de Afahrt richtig Schwägalp. Da isch den au bi de Cherene im obere Teil so öpis wies Passfeeling ufcho. Zurit sind die schöne Schwizerpäss no alli mit Schnee bedeckt und mehr mues sich mit de Höger bis 1500müM zfride gä. Hoffentli das die erschte Päss a de Ufert ufgmacht werded un ich eu über mini erscht Passfahrt schribe cha.Nach de Passhöchi isches denn mit eme 83er sloch ab gange. Nachher isches den no über de Ricke gange und denn zrug uf Binz. Am Schluss hani den 180Km und 2549 Höhemeter ufem Tacho gha unds erschti mal die Saison es paar Kilometer chöne churz fahre.

Bis bald
Cycling Mario

Sattelegg Tour

2010-03-24T22:22:00.001+01:00

Am eis hämer bim Nüsslichreisel in Uschter abgmacht. Das heisst, de Jok de Pesto und ich. Hüt wämmer serscht mal es paar Höhemeter am Stuck fahre und dafür gömmer über Sattelegg. So simmer den von Uschter über Hombi, Rüti, Eschebach, Uznach, Benke durd March richtig Sattelegg gfahre. D'Sunne hät eus dezue iglade di warme Wintersache di hei zla und die wies rasierte Wade z'presentiere. A de Wade gsesch no guet wie de ander zwäg isch und wis so umen stat. In Uzne hämmer den de erschti halt gmacht zum na Tanke. Zum Glück hend jetzt scho vil Brüne wider Wasser. Als Velofahrer ischs wichtig das weisch wo Brüne sind zum na Tanke. Denn ich füle im normalfall nume ein Bido uf mit Wasser und im andere isch denn Spezialmischig parat zum nafüle. Ich chauf ja nöd extra es liechts Velo das i nocher wider mit 1.5 Kg Wasser belade. In Neuhus hämmer den nomal aghalte zum am Jok sini schaltig i'dstelle. Ab denn hämmer eine ufegschalte und sind imene guete Tempo uf Siebne cho. Ab da simmer imene regelmässige Tempo id Sattelegg ufegfahre. Dobe acho hets no Schnee gha un de Lift isch au no gloffe für es paar Schifahrer und Snowboarder. Jedem das seine di einte chönd nöd gnueg frue mit dem Velo über dhöger und die anderer nützed de Schnee bis zum letschtä. S'Reschti hät offe gha und mir händ eus nach dem schöne ufstig es Eisidler Bier gönt. Für de Jok isches erschte Bier wäred em Velo fahre gsi. De Pesto und ich händ eus ja scho eis bi de Rhifalltour gönt. Nach de chüele Abfahrt simmer über Brugg vom gfrohrne Sihlsee gfahre. En churze abstächer hämmer den noch gmacht, um in Eisidle en Sack Schafsböck (Eisidler Spezialität) chaufe. Ab denn isches imene guete Tempo (max. 78km/h) richtig hei zue gange. Für mich isch das e richtig schöni Usfahrt fürs Swissteam Tortour 2010 gsi.

Rheinfall Tour

2010-03-20T22:00:00.002+01:00

Hola Ciclistas

Die Tour isch so richtig für de Früelig gmacht. Es gat hi und da es bitzeli ufe und abe und am Schluss häsch e drü steligi Zahl um em Tageszähler und guet 1000 Höhemeter.
18 Grad hets gha woni nach de eise in Binz abgfahre bin. In Volki hani den de PesTo troffe. Mir händ ois vorgna go luegä wivil Wasser abe flüst. Mir sind über Efi, Lindau, Brüte, Tüfe, Berg am Irchel und den am Rhi entlang bis uf Neuhuse am Rhifall (Start Tortour) gfäre.Für das, dass es so schön Wetter gsi isch he mir nöd mänge Mügglifrässer uf dere Strecki troffe. In Tüfe het sich den doch no eine eus as Hinderrad ghänckt. Ok, denn wämer doch mal luege was er druf hät. Es bitzeli gas ge und scho bald het er sich wieder verabschidet. Das macht halt immer wieder Spass, de andere es bitzeli uf de Za füle. Wo mir grad so im Schuss gsi sind, simmer mit eme 55er richtig Berg am Irchel zuegfloge. Ab denn isches gmüetli am Rhi entlag gange bis mir am Rhifall i troffe sind und wie die andere Turischte es Foti gmacht händ. Da mir scho es paar Kalorie verbrucht händ, simmer ane ghocket und hend en Espresso, es Schoggigipfel und es Falkebier gna. Leider hämer bim ga eusi Bido nöd chöne uffülle da d'WC alag zue gsi isch. Das hämmer den spöter bereut. Denn erscht in Eglisau hämmer en Brune zum uffüle gfunde. Ab Eglisau hets den au no Wasser vo obe gä und das het eus denn au bis hei begleitet. Zfride in Dübi bi 12 Grad hämmer eus tschau gseit und eus gfreut uf e warmi Duschi und e guets Bier.

Hasta luego
Cycling Mario

Früehligsgfühl

2010-02-27T22:22:00.009+01:00

Sunneschi am Himmel und 3 Grad häts gha woni am 8:45 losgfahre bin. Am 9:00 hani mit em PeSto bim Chreisel in Zollike abgmacht. Mir wänd hüt de erschti hunderter uf de Strass mache. Das es nöd so sträng wird,händ mir zwei Seeä Tour (Zürisee und Obersee) gfahre. Zerscht bis uf Rappi alles uf de chline Schibe. So wimers gseit händ max. 130 Puls und 100 mal Kurble pro Minute. Womer dänn in Jona bi de Bruech verbigfahre sind händs de Föhn im Zigerschlitz agschtellt und wis es so isch ufem Velo, wenn de Wind gäge dich isch häsch mächtig Z'kämpfe.Mit jeder halb Stund me womer underwägs gsi sind hät au Temperatur zue gna. Wo mer de Stutz in Tugge City hinder eus gha hend, isch de Wind immer no gege eus gsi. In Altendorf hemer den no en churze halt bi Squadro Mondo gmacht. Churz öppis gässe und ä chli länger id Schaufenschter glueget. Denn si mer a de Pfnüselküschte entlang gfahre mit zwei Gümmeler im Schleptau. Füere het vo dene keine wölle. Es sind e setig gsi womer nöd so gern hät. Nume schlüchle und keis Wort säge. Aber vo dene gitz leider me als anderi. Öpe uf de höchi Wädeswil ham no eine miteme Roimabügel troffe. Gfahre ischer au eso. Vollgas dänn wieder hangela usw. Churz vor Horge hat eini mit em Auto a vo Hupe. Da häts am Triathlet usghänkt und isch derä am Auto dur Horge na gfahre bis si a ghalte hät. Was die beide enänd gseit händ wüssed mir nöd da mir witter gfahre sind. Und uf eimal isch er dänn wieder vo hine cho hät ois überholt und isch miteme dicke Gang witergfahre. In Züri häm er in dänn wider i gholt. Bi de Quai Brug hämer dänn no a ghalte für e foti säschen. Was drus wörde isch gsender uf de Fotis. Nach de sälbscht Foti hämer dänn no öper gsuecht wo es Foti vo ois beide macht. Mir händ dänn a vo luege wer da in frag chunt. De erscht wo eus Fotografiert hät, isch en Turischt gsi. Und so hät er au Fotografiert. Dänn s'wichtige bi im uf de Foti sind nöd mir gsi, sondern Skyline vom See mit de Bergä im hindergrund. Nachdem mirs aglueget händ, hämer nomal öper anders gsuecht. Mir sind denn au no anderscht ane gschtande das mer ois uf de Foti erchänt. Nachdem mir dänn wider los gfahre sind, hät de PeSto no en chline zämeschtoss mit em Italiener gha. Zum Glück isch es mit chline blesure für de PeSto und fürs Auto usgänge. So hät de Italiener am sim Heck no es adänke a Züri. Nachdem mir no d'Schlyfi ufe gfahre sind häm mir eus in Witike verabschided und sind bi wärme 9 Grad zfride dä hei a cho.

Chreisel Zollike

Stutz bi Tugge City

Foti vom Züri Touri 1

Foti vom Züri Touri 2

alea iacta est

2010-02-17T23:00:00.008+01:00

Sit hüt hani es Saison Ziel.Ich fahr das Jahr a
de Tortour mit. Das heisst ei mal um d'Schwiz.
Infos under www.tortour.ch
Da em PeSto sini Bänder no so sind wie si söted,
dörf ich sind Platz i nä. Somit fahr ich mit em Jok
im zweier Team a de Tortour mit. Das chunt guet!!!
Euse Name Swissteam.
Ab sofort heisst das, Organisiere und Trainiere
für de spezieli Event. Mir wänds ja gnüsse.
Meh dezu nachem nöchschte Meeting.

Wintertraining

2010-01-20T22:30:00.003+01:00

Leider isch s'Wetter nöd grad s'bescht für Outdoor usfahrte. Denn wenns so vil Salz uf de Strasse hät, isch mis Velo nöd iverstande mit dem. Somit bini zurzit underground am Velofahre. Denn das, chani eifach nöd la. Rolletraining hat aber au sini guete site. Da het mer wieder mal vil Zit zum Film und Music Konzert luege.

Jetzt hofi das s'Wetter wider besser wird und ich bald wieder über mini Toure chan brichte.

Erschti Usfahrt 2010

2010-01-04T07:22:00.000+01:00

Hüt hani mis erschte Strassetraining im 2010 gmacht. S'Wetter het nöd chöne schöner si. Ufem erschte Kilometer häts no Schnee gha und das isch doch mitem Rennvelo immer wieder ä herusforderig. Nachher isches gruen und troche gsi. Temperaturazeig in Binz hät minus 2 Grad a zeigt. Uf minere Usfahrt hani den au no es paar anderi Rennvelofahrer gse und grüest. Wobi das mit em grüese isch sone sach. Dazu aber e anders mal me. Nach minere Operation am linge Bei isch das hüt au mini erschti Usfahrt gsi. Ich han mir am linge Bei müese d'Chrampfadere use operiere la. Zum Schluss no es par Föteli vo de Usfahrt.

Blog Start 2010

2010-01-01T19:10:00.000+01:00

Herrzlich Willkomme uf minere Blogsite won ich über mis Hoby de Radsport duen schribe.
Ich wirde regelmässig über mini Toure und alles was ich so erläbe informiere.

Wünsch allne no e guets 2010 und villi schöni Kilometer.

Rheinfall Tour 2009